Informazioni sull'opera
Boxi in su Scuriu
A bèllu-bèllu
passant is'oras
de sa notti
frida e silentziosa.
S'intèndiri
insaras
aintru de su coru
battiri tristi e forti
una boxi marigosa.
Est sa boxi dolenti
de sa terra mia:
spantu e prantu
de sarda genti!
Su lontanu sobi
chi cumintzada a calentai
non m'aggiudada certu
a cantai.
Su cantu miu
est amargura e spantu
chi curriri in s'aria gelida
e si perdidi in su scuriu.
Po su populu miu olia cantai
isperantzia e allegria
inveci seu cumenti sa rundini
in circa de su niu perdiu.
E
in su bolu
e su cantu miu
nc'est tottu sa tribulia
de un populu deludiu.
Minieras e fabbricas serradas
sunt lassadas in gui
solas:
fridas mudas sentineddas
de un operosu passau.
Eccu
custu est s'arregalu
pagu disixiau
donau de tottus is mèris
chi hant sempri furau.
Deludiu serru custu cantu
dedicau tottu
a sa terra mia
chi deu stimu tantu!
Titolo | BOXI IN SU SCURIU |
Sezione | |
Autore | Lampis Antonio |
Nome | B20030038 |
Anno | 2003 |
Argomento | |
Descrizione | |
Lingua | |
Editore | Premio Ozieri |
Contributore | TecnoService |
Tipo | |
Formato | |
Fonte | Premio Ozieri |
Relazione | Concorso Premio Ozieri 2003 |
Copertura | Italia, Sardegna, Logudoro |
Diritti | Comune di Ozieri - Premio Ozieri |
Analisi del Testo |