Deus soberanu ... (sestiglia retròga)

Deus soberanu
Mere onnipotente
de su criadu e de ogni abitadore

Babbu de fizu malu pecadore
e de fizu amorosu ubbidiente

sies de guida e faru lughente
c'amos bisonz'e paghe e de amore.

Narant chi Tue ses su Redentore
e des salvare su ch'est rue rue

narant su Redentore chi ses Tue
salvare su ch'est rue rue des

narant chi Tue su Redentore ses
e su ch'est rue rue des salvare.

Beta un'ojad'a sos chi sunt in mare
cun d'una carreta 'etza istampolada

a sos chi sunt in mar'eta un'ojada
cun d'un'istampolada 'etza carreta

a sos chi sunt in mare un'ojada eta
cun d'un'istampolada carreta 'etza.

De siguru no'balent mesu petza
però sunt fizos Tuos issos puru

mesu petza no' balent de siguru

sunt issos puru fizos Tuos
però

mesu petza 'e siguru balent no'
issos puru però
sunt fizos Tuos
e merìtant azudu
a sos congruos

e rispetu che pedras de nuraghe.

Deus soberanu
Mere onnipotente
de su criadu e de ogni abitadore

Babbu de fizu malu pecadore
e de fizu amorosu ubbidiente

sies de guida e faru lughente
c'amos bisonzu de amor 'e paghe.

Cheres T'invoche mancari m'istraghe
po sos potentes meres de su 'inari

cheres T'invoche m'istraghe mancari
po su 'inari 'e sos potentes meres

mancar'istràghemi T'invoche cheres
po su 'inari 'e sos meres potentes.

Gherra ingiusta sa 'e sos prepotentes
chi dominare cherent custa terra

ingiusta sa 'e sos prepotentes gherra
chi dominare cherent terra custa

sa 'e sos prepotentes gherra ingiusta
chi custa terra dominare cherent.

Si de s'idea mia totu esserent
meda armonia e pagu avolotu

si de s'idea mia esserent totu
pagu avolotu e med'armonia

si totu esserent de s'idea mia
pag'avolotu e armonia meda

ne bistimentas
ne abidos de seda
ma s'amigansia chi semper chilcamos.

Deus soberanu
Mere onnipotente
de su criadu e de ogni abitadore

Babbu de fizu malu pecadore
e de fizu amorosu ubbidiente

sies de guida e faru lughente
c'amos bisonzu de amor 'e paghe.

Miserere
ogn'ora Ti cantamos
ca cun Nostra Signora as su podere

Ti cantamos ogn'ora "Miserere"
c'as su podere cun Nostra Signora

Miserere
Ti cantamos ogn'ora
c'as su podere cun Signora Nostra.

Est custa vida un'eterna giostra:
prus est moderna
prus est atrivida;
est un'eterna giostra custa vida:
prus atrivida est e prus moderna;
est custa vida una giostra eterna:
prus atrivida e prus moderna este.

Chie famidu e nudu
no' at beste

chie bentrudu
semper ben'estidu;
chie beste no' at
nudu e famidu

chie ben'estidu semper e bentrudu;
chie beste no' at
famidu e nudu

semper bentrudu
ben'estidu chie:
unu chi bivet a die po die

s'ateru che invitadu in isposonzu!

Deus soberanu
Mere onnipotente
de su criadu e de ogni abitadore

Babbu de fizu malu pecadore
e de fizu amorosu ubbidiente

sies de guida e faru lughente
c'amos bisonzu de amor 'e paghe.

Deus istimadu
veru tistimonzu
de s'operadu umanu semper peus

veru istimadu tistimonzu
Deus
de semper peus s'uman'operadu

Deus
tistimonzu veru istimadu
de s'operadu semper peus umanu.

Bi nd'at chilcande una 'etada 'e manu

sunt in s'istrada fea trambucande;
una 'etada 'e manu 'i nd'at chilcande

sunt trambucande in sa fea istrada;
chilcande un'etada 'e manu 'i nd'ada

sunt trambucande in s'istrada fea.

Cantos fastizos e canta pelea

rànchidos mossos e tantos disizos!
Canta pelea e cantos fastizos

rànchidos mossos e disizos tantos!
Canta pelea e fastizos cantos

tantos disizos e rànchidos mossos!
Tue chi tenes poderes divinos
indìt'atotu sos giustos caminos
finas a consumare custos ossos!


Antonio Piras
01-10-1950
viale Kennedy
15
09078 ScanoMontiferro (OR)
Tel. 0785 32554