ANCORA PRO TE

Ite consolu si haere ischidu,
Comente unu liricu cantore,
Faghere poesias de amore,
Bellas,in bantu a s'amorada mia.
Tenzende cussu donu,forsis dia,
Resessire a la tenner in su nidu.

Onzi momentu mi punghet s'idea,
Cumponner bellas cantones pro te.
Tue,però,non bides in me
Finesa de un'abile iscrianu.
Ma sos joghittos de pizinnu ajanu,
Mi faghene cantare,cara Dea.

Cant'ancora pro te,cant'ancora,
A boghe lena,muttos de cantone,
Cun fantasia o bia passione
De sinceru e fidele innamoradu.
M'has da sinu su coro furadu,
Tue,Barbara mia,incantadora.

Ti giamo e no has cumpassione
Nè dolu de su tristu istare meu.
Move,a una orta,e in recreu
Faghemi cambiare s'angustia.
Cherfende tue,cun s'ojada ebbia,
Dare des paghe e consolazione.

Però fues e cun odiu miras
A mie,chi regiro pro t'amare;
Non sentu dolentia a mi lassare
Suspirende,arreu,in tant'affogu.
Feas,de Orca,miradas de fogu
i mustraso,si appena s'oju giras.

Si mi amas,non sigas su dispettu,
Riemi chen'ingannu,a bon'umore.
Tra sas rosas,pro me ses su fiore,
Pius bellu chi antet su eranu.
Finas chi nom mi das su cor'in manu,
Eo sempre pro te,ist'in'isettu.

Su Pastoreddu


S'IMPIGNU

S'impignu dae sa morte non t'hat frantu,
Cheren ch'addoloridu no mi sie?
Lassad'has tottue finas a
Ischende chi ti fia caru tantu.

Sos lizzos de sa fossa,in campusantu,
cun lagrimas infustu happo a tie.
Sos rajos risplendentes de su die,
In chizzos non m'assutan su piantu.

De sa luna su tantu risplendore,
In notte chi lontana ch'est sa nue,
Sa visione tua mi hat pintadu.

M'ingaleno e m'ischido cun dolore,
Pensende chi mancadu mi ses tue,
Ait'eo in vida so restadu?

Su Pastoreddu

CAMPANA A FESTA

Pro Te de su Rimediu
Sonat toccos a festa sa campana
De Uthieri,in sa turre Isulana
Tinnit tottu su brunzu de allegria,

Acò gente accudit a fiottos,
Istranzos de s'antiga cittadella.
Pro venerare sa Madonna bella
Faghen oras d'istrada sos devotos.

Cumprin s'impignu,sa promissa insoro
In lode de sa Vergine Divina.
Poi si cale o chie est ballerina,
curret a sa piatta,a bonu coro.

Disvagos a donz'ala (a sa cittade
Agatan sas amigas e amigos,
Agatan puru sos ballos antigos,
Cun sonos bellos de variedade.

Est tottue incantu;sas carreras
Sun pienas d'allegras coItivas,
Gente de umore,ispansivas
Pessones de su logu e furisteras.

Cantas trumbitas e pipiriolos,
S'intendene sonare,in Cantareddu.
Divertidi su ezzu,su piseddu
Godit unu mundu e consolos.

Dansadoras briosas de sas biddas,
Lean parte a su ballu e su costumene.
Imbidiosas d'achistare lumene,
Bogan da sutta pes sas ischentiddas.

S'iden'attentos,dae trettu in trettu
Omines de su soziu abbizzos?
Pro dare avvertimentos e consizzes
De osservare ordine e rispettu.

Peró est a primore s'andamentu,
Non s'intenden muinas de dolore;
Tottu est risu e giogu.tottu amore
Durche,unueranu e godimentu.

Sighi campana,allegra non funesta;
Bastat su dolu,su male passadu.
Annunzia a su tou populadu
Chi cuntentu,chent'annos,fattat festa.

Su Pastoreddu