Abu Ghraib!


Abu Ghraib! It'inferru
Sennore!
S'ateru sero
in televisione

s'immazine orrorosa 'e sa presone

in s'iscurrere lentu e sas iscenas

m'at turmentadu s'anima e in benas
su samben at perdìdu onzi alore.

Travas
cadenas
puntorzos e frustas

corpos sentza difesa
umiliados

agutzinos sentz'anima
airados

e gridas de dolore e ispaventu.
Mancu sos campos de cuntzentramentu
an bidu vizilias che i custas.

Abu Ghraib! Triste
umiliadu

m'irgonzo d'èsser omine. Ma lu este
chie
sentza motivu
estit sa este
de buzinu crudele e inumanu?
O est omine
forzis
su ardianu
ch' indiferente s'est ingalendu ?

E puru
Deus meu
a mannosia

a immazine Tua e similantza
l'aias fatu
nidu e sentza mantza

e fatu mere 'e su zardinu amenu

ma su serpente puntas de velenu
l'at postu in benas pro sa zelosia.

Abu Ghraib! "Però sun terroristas

naran in tantos
duncas
pacu male

si los trattan a ghisa 'e animale

dente pro dente
coment'est iscrittu"
Ma tando.... su serpente maleittu

at fattu dae nou conquistas!

Bi fit
abberu
sa netzessidade
de torturare a morte s'assassinu?
Ammenta chi si ochies a Cainu
fintzas pro tene
sa die 'e s'interru

s'aberin sos percarzos de s'inferru

a focu alluttu pro s'eternidade.

Sa vida e i sa morte non sun tuas

ornine sentza fide
iselleradu

e de nou as a benner ischizadu
serpente malu
fintzas si ti cuas!

Santino Marteddu
via Goceano
5
08029 Siniscola
Tel. 0784-877341