CONSOLA SAS ISPERAS ...

Tota vida ti chilco,
ma fin'a oe non t'ap'incontradu.
Totue apo giradu,
e attent'osservende,
nessi pro nde mirare calchi lampu:
ma de te nudda: manc'unu signale.
T'apo chilcad'in s'amena campagna
in mes'a sos beranos in fiore,
'ue est cantu 'e puzones e recreu :
in sa domo de unu poberittu,
de miseria afflittu,
ma riccu 'e onestade,
de tanta dignitade,
cun d'unu mann'e apertu sorrisu,
ispiju de un'anima serena.
Ti chilco ancora
in intro 'e milli mares de dolore
de tantos frades mios sufferentes,
inue sas boghes de lamentu
m'intran in coro che unu pugnale .
Curret su pensamentu
in sas intragnas de sa mente mia,
e a bolu che brincat
su lugore de totus sas istellas,
ma de te mancu s'umbra;
e finz'a oe
van'est 'istadu su chilcare meu.
Eppuru so' cumbintu chi bi ses:
e s'est gai
beni e consola totus sas isperas,
in cust'andare meu senza pasu;
movedi premuros'a mi chilcare,
tue so' zertu ch'agattas a mie,
prima chi ande a s'iscuru eternu,
Deus caru ...