S'URTIMU SONU

No sciu prus cali siat
s'urtimu sonu.
Fiat forzis, cussu de s'urtimu
corpus de marteddu asub"e su baullu
de babbu miu?
O s'arraspai in su muru
in foras de sa ventana
cun s'arrecciad"e ferru,
de unu cani nieddu
chi cun zunchius allonghiaus
po su turmentu, prangiat
sa morti chi arribàt?
O est istetiu
su sonu tristu de sa campanedda
in foras de sa port"e s'ispidali
aundi hant arricciu
e aundi est morta mamma mia?
O sunt is izzerrius de sa terra mia,
po is matas segadas e abbruxadas,
po is aquas pudexias,
po is isparus e scoppius de bombas
de is aereoplanus e navis istrangias;
chi si faint gherra
senz"e dd'hai mai dichiarada?
De su sperefundu 'e s'anima,
... hoi. .. circu de cumprendi
cali sonu siat stetiu ... s'urtimu sonu .
Ma ancora no ddu sciu, no conosciu
cussu sonu.
Podit essiri chi sia circhendiddu
po de badas in is scurius
de una notti allurpia de interessus
chi 'nc'hat ingurtiu totu...
finzas s'urtimu sonu miu,
e chi forzis' hap'a intendi
scèti s'urtima dì...