NOTTE LONGA

Longa est sa notte.
Su suspiradu sole non s'accerat
a ispannare s'antigoria neula
ch'hat incrostadu s'anima
e attogat s'amena terra mia.
Longa est sa notte.
Non fiorit beranu
e ne de Pasca campanas festosas
si pesan cun su sole risulanu
chi s'abbrazzet sa terra
imbirdida de sonnios pizzinnos.
Pesadi sole,
has promissas chi non deves traighere.
T'isettan in sas fabbricas tancadas
buccas limosinadas
cun pane chene sale de suore.
Irrobadu de saliosos padros,
zedidos a s 'istranzu
a b'ingrassare sos carros armados ...
pro s'appentu 'e sa gherra,
t'isettat su massaju-pastore
murghidore 'e cabijos carigados.
Pesadi, sole.
Che-i su chircadu pane .
ti sonnian sos fuidos
a-e cudd'ala 'e mare
brujados da-e sa frebba de torrare
da-e lontanas, tristas, camineras
de paghe faularza
ch'infustu hana de samben e suore :
sa frebba 'e s'asseliare
in su jogulu de sa marna terra
chi, raida 'e promissas e d'isperas,
lis torret a cantare
cubìdas anninnias d'amore
in su limpiu manzanu
de custa notte longa.